一間公司值幾錢（2）：人類的智慧| 是咁的，我想創業 - 立場新聞

bussinesfor.blogspot.com

上文提到，無現金流同未上市嘅公司，因為市場非常唔流通，投資者亦唔多，「價格」係唔同人眼中差距十分之大。現實中，即使早期投資者本身，其實亦都無標準去如何估計。

無機制、系統嘅時侯，就係依靠人類智慧最多嘅時侯。衰啲講句就係靠估，好聽啲就係經驗。亦都係點解要認識早期投資咁難，因為資訊量絕大部份都係人腦入面，而非Google或者教科書。經驗以外，亦都有啲現行嘅輔助方法，大致歸納 3 種：

1️⃣ 以同類公司比較：現成有唔同嘅早期交易 database 嘅存在，例如 Pitchbook、Crunchbase 等。絕大部份都係美國為主，亞洲嘅資訊比較缺乏，大部份亞洲地方都自成一格。Database 多數係比較大嘅 startup 會較為準確，好多人都唔知佢地收集嘅方法其實都係靠自願提供或者自己嘅新聞渠道 — 每個 quarter Crunchbase 都會 send 個 excel 去問你有無 update。雖然以後期同類型公司嘅估價同公司規模，再 extrapolate 推算番前期嘅 range 都係一個可取嘅方法。但比較有經驗嘅投資者，多數用於參考佢地未來嘅市值，而非決定現行價值。

2️⃣ 以風險作參考調整價錢：早期公司風險黎黎去去都係幾樣，唔重要個啲唔講。

🚩 團隊 🚩 兩個商業L去搞人工智能startup，死得啦，除非係好要行業知識嘅，咁又唔同喎。兩個 PhD，又唔一定死得喎。因為科技要嘅知識含量高好多，你估人人搞 coding class 就真係人人都 code 得到出神入化咩？商業知識，練番黎架姐 — 睇下「是咁的」都會識 ^_^。
🚩 市場 🚩 你賣到多幾個國家同賣得一個梵帝崗，好影響你可以賺幾錢嘅瓶頸。
🚩 啇業模式 🚩 搵岩方法收人錢唔容易。你估 Spotify 開頭同你講我收 48 蚊一個月比你任聽歌，你係投資者驚唔驚？
🚩 技術 🚩 唔識嘅人，會用專利去計（偷笑 mode，近排先有人同我講計間公司有幾多個專利）。呢個就係專利嘅弊病，搵篇同大家講專利。唔識睇專利嘅人就會覺得多專利＝高科技。
🚩 競爭密度 🚩 你個市場多人同你爭，你爭到個餅就愈細。人人都話佢個 idea 係最好，現實中，投資者唔會幻想你係 monopoly。

有人劃分幾份加加減減去計。每人都用唔同嘅方法，十個投資者，跟著嘅話就以經要拗到你死我活。現實中，多數係用黎睇一間公司有無 over-value，而好少用黎定價。

3️⃣ 以Traction販賣未來：心理學有個 term 叫 positive reinforcement，不斷重覆提醒對方風險，倒不如給予希望 — 一個公司未來有好高升值潛力嘅夢想。例如有好嘅早期投資者、大客戶嘅肯定等，投資者認為公司後期好有機會可以搵到名牌 VC 例如 Softbank 等接手，公司就可以叫價高啲。如果你係投資者，唔好拒抗呢個未來，你買嘅就係呢個未來。

現實中，投資者們多數會將傾過嘅公司放係自己嘅 excel（係呀佢地投科技，但自己用 excel）。當你睇得多，靠口耳相傳去得知每個國家、地區、科技範疇嘅估值範圍（因為一個早期投資者一年有機會睇超過一千單投資機會），佢地就會大概心目中有個價。呢個價個個都唔同，係呀，個個睇嘅世界都唔同，你都唔可以逼佢用你個方法去睇你間公司。所以早期投資今時今日，真係靠估同人夾人。

複雜性反而係在於，如果公司要進行多次融資，就要計好每次出售嘅股權數目。因為股權，除左承載住價值，亦都承載住控制權。所以除左投資者（需求方）之外，價格亦都要顧慮公司每次可以出售嘅股份（供給）。後者係好多創業家同早期投資者犯嘅錯誤：早期過度出售股權。好啦，太長喇，又另一篇再講。

作者 Facebook